Ме тэнӧ зэв ёна радейта, мамук!!! Тэ медся муса, медся матыс, медся мелі да рам морт, кодӧс ме тӧдлі олігчӧжым. Тэ эн куж видчыны, тэ век олін сідз, медым ставыс гӧгӧрад вӧлі югыд да лӧнь, медым ставыс вӧлі лючки да ладнӧ. Тэ некор некодлысь эн корлы унасӧ, тырмӧдчин медся коланаӧн, тэ пыр кӧсйин, медым ставыслы вӧлі бур. Тэ некор эн лӧгасьлы миян вылӧ, весиг кор ми мыйкӧ вӧчлім несідз. Сваик да Иришка пыр вӧліны тэнад муса челядьӧн, и аслад кагуэз вӧсна тэ век тӧждысьлін, кӧть и важӧн верстьӧяс нин лоим. Ме ёна каитча мамук, мый бӧръя кадӧ вывті нин шоча вовлі тэ дорӧ, гортаным. Тэ ӧд бура тӧдан: тэнсьыд чужан коми кыв ловзьӧдӧм — тайӧ менам вежа могӧй таладор югыдас. Уджалігтыр ме тшӧкыда вунӧдлі тэ да чоюк йылысь, весиг эг быд вежон звӧнитлы тіянлы. И та вӧсна ме мыжа и век кута лыддьыны ачымӧс мыжаӧн, ӧд эг вермы видзны тэнӧ, маминьӧй! Немортъяс киысь тэныд лои кадсьыд водз мунны мӧдладор югыдӧ. Му выв омӧльыс тшыкӧдӧма тэнсьыд рам кузь нэмтӧ, шуштӧм здукъяс лои тэны...